‘O Sfardista”: versi di Paolo Ferrillo, declamati da sua sorella Gianna

                                  

'o sfardìsta

'o càmio arriva

quanno è ancora scuro,

a tràino, na caurara

ca va accustata 'o muro

'a enghieno 'e catràmma,

nera comm' è 'a notte,

sotto, piezzi 'e lignammo

e fasce 'e casce rotte

'o calore lla vvicino

è na cosa esaggerata,

chi fatica attuorno 'o ffuoco

sta' già tutto avvampato

quanno arriva 'a primma luce

'a sfarda è già squagliata,

bitumma e sabbia griggia

tutto nzieme hanno ammiscàto

quanno volle, fa 'e quàqquari

ca se schiàttano schizzànno,

pare 'a lava d' 'o Vesuvio

mentre 'a ggira e sta' cucenno

na buatta mponta 'a mazza,

ca lle serve a travasà,

senza uanti, fanno 'e ccose

stanno attienti a nun s' abbrucià

'a trócciola é muntata,

'e cardarelle stanno pronte,

chi tira 'a funa tene

e vvracce forte e 'a scolla nfronte

so tutti quanti frate,

ncoppo all'astreco sta 'o masto,

Salvatore chiamma 'a rrobba

chella che saglie nun abbasta

sta accuato, va 'a gghji arreto,

tira 'a riella e nun s' arresta,

chille 'e vascio votteno 'e mmane

pecchè ncoppa, 'a sfarda ndosta

cu' 'a rasóla 'e legno mmane,

cu 'a cucchiara ind' 'a chell' ata,

stregne 'e strisce, ncasa forte,

tene 'e rine scummigliati

cuónce cuónce nfoca 'o sole,

è pesante 'sta fatica

e ll' addore da caurara

ha enghiuto tutto 'o vico

asciutta 'a fronte cu nu vraccio,

'o surore sta' scorrenne,

se fatto quasi miezojuorno

'a jurnàta sta fernenne

stùta 'o ffuoco, pulezza 'e fierre

comme ha fatto pure ajere,

n' ce sta' n'attimo e ricietto, 'o sfardìsta,

'o cchiù faticàto d' 'e mmestieri.

 

Ferrillo, di origini calvizzanesi, scrive canzoni, suona, dipinge: dal 2014 vive a Neive, provincia di Cuneo.